ធ្លាក់យន្តហោះយោធាស៊េរីថ្មីនៅថៃ បណ្តាលឱ្យមន្ត្រីកងទ័ពអាកាស ២នាក់បាត់បង់ជីវិត

កងទ័ពអាកាសភូមិន្ទថៃបានជួបប្រទះនូវសោកនាដកម្មដ៏រន្ធត់មួយ បន្ទាប់ពីយន្តហោះយោធាស៊េរីថ្មីប្រភេទ AT-6 បានធ្លាក់អំឡុងពេលហ្វឹកហ្វឺននៅក្នុងតំបន់ព្រៃភ្នំ នៃខេត្តឈៀងម៉ៃ កាលពីថ្ងៃទី២៩ ខែមករា ឆ្នាំ២០២៦។ហេតុការណ៍នេះបានបណ្តាលឱ្យមន្ត្រីកងទ័ពអាកាសចំនួន ២ រូបដែលស្ថិតនៅលើនោះបានបាត់បង់ជីវិតភ្លាមៗ។

យោងតាមការចុះផ្សាយរបស់កាសែត Bangkok Post យន្តហោះដែលជួបគ្រោះថ្នាក់នេះ គឺជាប្រភេទយន្តហោះវាយប្រហារធុនស្រាល និងស៊ើបការណ៍ ដែលកំពុងធ្វើសកម្មភាពហ្វឹកហ្វឺនហោះហើរធម្មតា។ បច្ចុប្បន្ន អាជ្ញាធរ និងមន្ត្រីជំនាញថៃមិនទាន់អាចបញ្ជាក់ពីមូលហេតុច្បាស់លាស់ដែលនាំឱ្យមានការធ្លាក់នេះនៅឡើយទេ ដោយកំពុងស្ថិតក្នុងដំណាក់កាលស៊ើបអង្កេតយ៉ាងយកចិត្តទុកដាក់។

អំពីយន្តហោះចម្បាំង AT-6

យន្តហោះប្រភេទ AT-6 (Wolverine) គឺជាបច្ចេកវិទ្យាស៊េរីថ្មីដែលកងទ័ពអាកាសថៃទើបតែដាក់ឱ្យដំណើរការ ដើម្បីជំនួសយន្តហោះចាស់ៗដែលត្រូវចូលនិវត្តន៍។ យន្តហោះនេះមានលក្ខណៈពិសេសជាច្រើនដូចជា៖
– តម្លៃ៖ ប្រហែល ១៧,៨ លានដុល្លារ ក្នុងមួយគ្រឿង។
– សមត្ថភាព៖ អាចបំពាក់គ្រាប់បែកនាំផ្លូវ គ្រាប់រ៉ុកកែត និងកាំភ្លើងយន្ត។
– បច្ចេកទេស៖ មានចំណុចសម្រាប់ពាំអាវុធចំនួន ៧ កន្លែង (ក្រោមស្លាប និងតួខ្លួន) ស័ក្តិសមបំផុតសម្រាប់ប្រតិបត្តិការនៅតំបន់ភ្នំ។

–

គួររំលឹកផងដែរថា រដ្ឋាភិបាលថៃបានចុះហត្ថលេខាបញ្ជាទិញយន្តហោះប្រភេទ AT-6TH ចំនួន ៨ គ្រឿង ពីក្រុមហ៊ុនអាមេរិក Textron Aviation Defense កាលពីឆ្នាំ ២០២១ ក្នុងគោលបំណងពង្រឹងសមត្ថភាពការពារដែនអាកាស និងទំនើបកម្មយោធារបស់ខ្លួន៕