រដ្ឋាភិបាលសហរដ្ឋអាម៉េរិកបច្ចុប្បន្នកំពុងស្ថិតក្នុងស្ថានភាពនៃការ ផ្អាកប្រតិបត្តិការ ឬ បិទស្ថាប័នរដ្ឋជាបណ្ដោះអាសន្ន ដោយសារតែវិវាទថវិការវាងសភា និងប្រធានាធិបតី ដូណាល់ ត្រាំ ដែលមិនអាចឈានដល់កិច្ចព្រមព្រៀងលើកញ្ចប់ថវិកាថ្មីទាន់ពេលវេលាកំណត់។
ការជាប់គាំងខាងនយោបាយនេះមានប្រភពមកពីការខ្វែងគំនិតគ្នាយ៉ាងខ្លាំងលើវិស័យថែទាំសុខភាព។ គណបក្សប្រជាធិបតេយ្យ បានទាមទារនូវទឹកប្រាក់រាប់រយពាន់លានដុល្លារអាម៉េរិក ដើម្បីស្ដារឡើងវិញនូវកម្មវិធីថែទាំសុខភាពដ៏សំខាន់ដូចជា អូបាម៉ាឃែរ (Obamacare) ប៉ុន្តែត្រូវប្រឈមនឹងការជំទាស់ពីសំណាក់ គណបក្សសាធារណរដ្ឋ។ ជម្លោះនេះបានរារាំងដល់ការអនុម័តច្បាប់ផ្ដល់មូលនិធិរយៈពេលខ្លី ដែលចាំបាច់សម្រាប់ដំណើរការរបស់រដ្ឋាភិបាល។
ផលប៉ះពាល់លើស្ថាប័នសហព័ន្ធ និងបុគ្គលិករដ្ឋ
ការផ្អាកប្រតិបត្តិការនេះមានន័យថា នាយកដ្ឋាន និងទីភ្នាក់ងារសហព័ន្ធជាច្រើននឹងត្រូវផ្អាកដំណើរការ។ ផលប៉ះពាល់ធ្ងន់ធ្ងរបានធ្លាក់មកលើ បុគ្គលិករដ្ឋាភិបាលរាប់សែននាក់ ដែលនឹងត្រូវបង្ខំចិត្តត្រឡប់ទៅកាន់លំនៅដ្ឋានវិញ ឬមិនមានការងារធ្វើរហូតទាល់តែស្ថាប័នរដ្ឋដំណើរការឡើងវិញ។ ក្នុងអំឡុងពេលឈប់សម្រាកនេះ បុគ្គលិករដ្ឋនៅតែជាបុគ្គលិករដ្ឋ ប៉ុន្តែ មិនទទួលបានប្រាក់ឈ្នួល ដោយត្រូវរង់ចាំរហូតដល់បញ្ហាថវិកាត្រូវបានដោះស្រាយចប់សព្វគ្រប់ ទើបអាចទទួលបានប្រាក់ខែរបស់ពួកគេវិញ។
ទោះបីជាយ៉ាងណាក៏ដោយ សេវាកម្មរដ្ឋសំខាន់ៗ មួយចំនួននៅតែបន្តដំណើរការជាធម្មតា រួមមាន យោធា និង សេវាប្រៃសណីយ៍ ប៉ុន្តែមុខងារផ្សេងទៀតនឹងត្រូវផ្អាក។ ការផ្អាកប្រតិបត្តិការជាបណ្ដោះអាសន្ននេះនឹងបន្តរហូតដល់កិច្ចព្រមព្រៀងផ្ដល់មូលនិធិថ្មីត្រូវបានសម្រេច។
ស្ថានទូតអាម៉េរិកនៅកម្ពុជា និងឡាវក៏រងផលប៉ះពាល់
ស្ថានការណ៍នៃការបិទរដ្ឋាភិបាលនេះ ក៏បានជះឥទ្ធិពលដល់ ស្ថានទូតអាម៉េរិក នៅតាមបណ្ដាប្រទេសជាច្រើនផងដែរ។ ជាក់ស្ដែង ស្ថានទូតអាម៉េរិកនៅក្នុងរាជធានីភ្នំពេញ បានបង្ហោះនៅលើទំព័រហ្វេសប៊ុករបស់ខ្លួនថា គណនីបណ្តាញសង្គមរបស់ស្ថានទូត នឹងមិនធ្វើបច្ចុប្បន្នភាពជាទៀងទាត់ នោះទេ រហូតដល់ប្រតិបត្តិការទាំងស្រុងត្រូវបានបន្តឡើងវិញ លើកលែងតែព័ត៌មានសុវត្ថិភាព និងសន្តិសុខបន្ទាន់។
ទោះបីជាមានការរអាក់រអួលនេះក៏ដោយ ស្ថានទូតបានបញ្ជាក់ថា សេវាកម្មសំខាន់ៗមួយចំនួននៅតែបន្ត។ សេវាកម្មលិខិតឆ្លងដែន និងទិដ្ឋាការនានាដែលបានណាត់រួច នឹងបន្តដំណើរការដោយស្ថានការណ៍អនុញ្ញាតបាន។ ក្រៅពីប្រទេសកម្ពុជា ស្ថានទូតអាម៉េរិកប្រចាំរដ្ឋធានីវៀងច័ន្ទន៍ ប្រទេសឡាវ ក៏បានចេញសេចក្ដីប្រកាសស្រដៀងគ្នានេះដែរ។ សម្រាប់ព័ត៌មានបន្ថែមអំពីសេវាកម្ម និងស្ថានភាពប្រតិបត្តិការរបស់ស្ថានទូតអាម៉េរិក អាចចូលទៅកាន់ travel.state.gov៕
