បន្ទាប់ពីឱសានុវាទបានបញ្ចប់ ការនាំចូលបន្លែផ្លែឈើពីប្រទេសថៃ ត្រូវបានបិទទាំងស្រុងតាមបណ្តាព្រំដែនចាប់ពីវេលាម៉ោងប្រមាណ ៩ព្រឹក ថ្ងៃទី១៧ មិថុនានេះ។
បើតាមលោក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍ មានទំនិញតែ២មុខប៉ុណ្ណោះពីខាងថៃ គឺបន្លែ និងផ្លែឈើ ដែលកម្ពុជាបិទទាំងស្រុងលែងឱ្យនាំចូលនិងឆ្លងកាត់ រីឯ ទំនិញផ្សេងទៀតពីខាងថៃ រួមទាំងអ្នកធ្វើដំណើរគ្រប់រូប (ទាំងពលរដ្ឋកម្ពុជា ទាំងជនជាតិដទៃ) អាជ្ញាធរកម្ពុជា នៅតែអនុញ្ញាតឱ្យឆ្លងកាត់តាមច្រកព្រំដែនបានធម្មតា។
លោកអគ្គនាយកបានបញ្ជាក់ថា ទោះអាជ្ញាធរកម្ពុជា នៅអនុញ្ញាតឱ្យរថយន្តដឹកទំនិញផ្សេងៗ និងអ្នកធ្វើដំណើរ អាចឆ្លងកាត់តាមព្រំដែនបានក្តី តែបើអាជ្ញាធរថៃ បិទច្រកព្រំដែន ឬតឹងរ៉ឹងខ្លាំងនៅតាមព្រំដែនមួយចំនួននោះ រថយន្តដឹកទំនិញ និងអ្នកធ្វើដំណើរទាំងខាងកម្ពុជា ទាំងខាងថៃ នៅតែជួបការលំបាកក្នុងការឆ្លងកាត់ ឬមិនអាចឆ្លងកាត់តែម្តង។
គួរជំរាបជូនថា នៅព្រឹកថ្ងៃទី១៦មិថុនា សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានប្រកាសថា រយៈពេល២៤ម៉ោង បើថៃនៅតែមិនបើកច្រកព្រំដែនឱ្យដូចដើមវិញទេ កម្ពុជា នឹងបិទច្រកព្រំដែនទាំងឡាយ ដើម្បីរាំងខ្ទប់រថយន្តដឹកបន្លែផ្លែឈើពីខាងថៃទាំងអស់តែម្តង មិនឱ្យចូលកម្ពុជា និងមិនឱ្យឆ្លងកាត់កម្ពុជាទៅវៀតណាម ប៉ុន្តែកម្ពុជាពុំមែនបិទច្រកព្រំដែនទាំងអស់នោះទេ។
ចំណាត់ការនេះ គឺជាការឆ្លើយតបទៅនឹងអាជ្ញាធរថៃ ដែលជាអ្នកចាប់ផ្តើមបិទច្រកព្រំដែនមួយចំនួនជាមុន ហើយច្រកព្រំដែនកន្លែងខ្លះទៀត អាជ្ញាធរថៃ បើកយឺតបិទលឿនខុសពីគោលការណ៍កំណត់ ដូច្នេះ ក្រោយមកកម្ពុជាក៏ឆ្លើយតបវិញ គឺបើកយឺតបិទលឿនដែរ។ បញ្ហានេះ ចេះតែអូសបន្លាយពីមួយថ្ងៃទៅមួយថ្ងៃ ធ្វើឱ្យប៉ះពាល់ដល់ការនាំទំនិញចេញចូល និងការធ្វើដំណើររបស់ពលរដ្ឋទាំងសងខាង។
រហូតដល់កម្ពុជាទាមទារឱ្យអាជ្ញាធរថៃបើកច្រកព្រំដែនទាំអស់ឱ្យត្រូវតាមម៉ោងកំណត់ឡើងវិញ ដើម្បីបញ្ចៀសការប៉ះពាល់រំហូរទំនិញ និងការធ្វើដំណើររបស់ពលរដ្ឋ ហើយដោយសារអាជ្ញាធរថៃមិនព្រមធ្វើតាមសំណើនេះ ទើបកម្ពុជាធ្វើតាមការប្រកាសរបស់ខ្លួន គឺបិទច្រកព្រំដែនរាំងខ្ទប់បន្លែផ្លែឈើទាំងអស់ពីខាងថៃ ចាប់ពីពេលនេះទៅ រហូតដល់មានការសម្រេចថ្មី៕
