តាមរយៈបណ្តាញសង្គមនៅល្ងាចថ្ងៃទី២២ មិថុនា នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានប្រកាសថា ចាប់ពីវេលាម៉ោង១២យប់នេះតទៅ ការនាំចូលប្រេងឥន្ធនៈ និងឧស្ម័នគ្រប់ប្រភេទពីប្រទេសថៃត្រូវផ្អាកទាំងស្រុង។
ចំណាត់ការរបស់នាយករដ្ឋមន្រ្តីកម្ពុជានេះ ត្រូវគេមើលឃើញថា ធ្វើឡើងឆ្លើយតបទៅនឹងគណបក្សប្រឆាំងថៃ ដែលទាមទារឱ្យរដ្ឋាភិបាលរបស់គេផ្តាច់ប្រេងឥន្ធនៈកម្ពុជា ដើម្បីជាការចរចា។
នាយករដ្ឋមន្រ្តីកម្ពុជាបានបញ្ជាក់ថា បណ្ដាក្រុមហ៊ុនចែកចាយប្រេងឥន្ធនៈនៅកម្ពុជា មានលទ្ធភាពនាំចូលប្រេងឥន្ធនៈនិងឧស្ម័នពីប្រភពផ្សេង គ្រប់គ្រាន់ ដើម្បីផ្គត់ផ្គង់តម្រូវការប្រើប្រាស់ក្នុងស្រុករបស់ប្រជាពលរដ្ឋ កុំថាឡើយត្រឹមមួយខែ ទោះជារៀងរហូតក៏មិនជាបញ្ហា។
គួរបញ្ជាក់ដែរថា នៅថ្ងៃនេះដែរ នាយករដ្ឋមន្រ្តីកម្ពុជា ក៏បានប្រាប់ឱ្យអាជ្ញាធរខេត្តឧត្តរមានជ័យបិទច្រកព្រំដែនចំនួនពីរផងដែរ គឺច្រកជប់គគី និងច្រកជាំ៕
