សម្តេចធិបតី ហ៊ុន ម៉ាណែត៖ កម្ពុជា មិនបានលូកដៃចូលក្នុងកិច្ចការផ្ទៃក្នុងប្រទេសថៃនោះឡើយ

សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍លើកឡើងថា កន្លងមក ភាគីថៃ តែងបានចោទប្រកាន់សម្តេចតេជោថា បានលូកដៃចូលក្នុងកិច្ចការផ្ទៃក្នុងរបស់ប្រទេសថៃ ដែលប្រការនេះ ជាការលាបពណ៌ មួលបង្កាច់ និងមិនមែនជាការពិតនោះឡើយ។

ក្នុងឱកាសអញ្ជើញជាអធិបតីប្រារព្ធ «ទិវាមច្ឆជាតិ ១កក្កដា ២០២៥» នៅខេត្តតាកែវ នាព្រឹកថ្ងៃទី១ ខែកក្កដា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងបន្តថា ការអនុវត្តវិធានការឆ្លើយតបរបស់កម្ពុជាទៅកាន់ភាគីថៃកន្លងមក គ្រាន់តែជាការរក្សាសិទ្ធិការពារខ្លួន និងបង្ហាញតម្លាភាពចំពោះប្រជាជនកម្ពុជាតែប៉ុណ្ណោះ។

សម្តេចធិបតី ហ៊ុន ម៉ាណែត បានអះអាងថា រាជរដ្ឋាភិបាល មានកាតព្វកិច្ចការពារប្រជាជន ១៧លាននាក់ ការពារសេចក្តីថ្លៃថ្នូរ និងកិត្តិយសរបស់ប្រទេសកម្ពុជាប៉ុណ្ណោះ ហើយកម្ពុជានៅតែរក្សាជំហរដោះស្រាយបញ្ហាព្រំដែនដោយសន្តិភាព និងតាមយន្តការច្បាប់អន្តរជាតិ នៅតំបន់មានជម្លោះដដែល។

បើតាមសម្តេចធិបតី ភាគីថៃ តែងតែចោទទម្លាក់កំហុសមកលើរាជរដ្ឋាភិបាលកម្ពុជាគ្រប់រឿង សូម្បីតែការធ្វើបាតុកម្មនៅថៃ ក៏ថៃចោទថាកម្ពុជាជាអ្នករៀបចំផងដែរ ដែលប្រការនេះ គឺជារឿងឆោតល្ងង់និងគួរឱ្យអស់សំណើចជាទីបំផុត។

សម្តេចធិបតី ហ៊ុន ម៉ាណែត បានគូសបញ្ជាក់ថា កម្ពុជា តែងតែរក្សានូវភាពអត់ធ្មត់ជាទីបំផុត ដោយមិនចង់ធ្វើឱ្យប៉ះពាល់ដល់នយោបាយផ្ទៃក្នុងរបស់ប្រទេសថៃឡើយ ប៉ុន្តែដោយសារតែភាគីថៃ ចេះតែបង្ករឿងមុន ទើបកម្ពុជាត្រូវចាត់វិធានការឆ្លើយតបទៅវិញ ហើយការឆ្លើយតបគ្រប់បែបយ៉ាងនេះហើយ បែរជាភាគីថៃចោទថាកម្ពុជាអាក្រក់ទៅវិញ៕