បន្ទាយមានជ័យ — លោក អ៊ុំ រាត្រី អភិបាលខេត្តបន្ទាយមានជ័យ បានអំពាវនាវដល់អភិបាលខេត្តស្រះកែវ ប្រទេសថៃ ឲ្យគោរពកិច្ចព្រមព្រៀងព្រំដែនដែលមានស្រាប់ និងបញ្ឈប់សកម្មភាពឯកតោភាគីណាមួយ ដែលប៉ះពាល់ដល់ប្រជាពលរដ្ឋកម្ពុជា។ ការអំពាវនាវនេះធ្វើឡើងតាមរយៈលិខិតចុះថ្ងៃទី២ ខែកញ្ញា ដើម្បីឆ្លើយតបទៅនឹងការទាមទាររបស់ភាគីថៃឲ្យកម្ពុជារើលំនៅឋានប្រជាពលរដ្ឋចំនួន ១៧០ គ្រួសារចេញពីតំបន់ព្រំដែនដែលកំពុងមានជម្លោះ។
នៅក្នុងលិខិត លោក អ៊ុំ រាត្រី បានបញ្ជាក់ថា ការទាមទាររបស់ថៃពាក់ព័ន្ធនឹងដែនអធិបតេយ្យមួយផ្នែក នៃភូមិជោគជ័យ និងភូមិព្រៃចាន់ ក្នុងឃុំអូរបីជាន់ ស្រុកអូរជ្រៅ គឺជាបញ្ហាដែលស្ថិតក្រោមសមត្ថកិច្ចរបស់គណៈកម្មាធិការព្រំដែនទូទៅកម្ពុជា-ថៃ (GBC) និងគណៈកម្មការចម្រុះខណ្ឌសីមាព្រំដែនគោក (JBC)។
លោកបានសង្កត់ធ្ងន់ថា «ការធ្វើសកម្មភាពដោយឯកតោភាគីណាមួយ ប៉ះពាល់ដល់ប្រជាពលរដ្ឋដែលកំពុងរស់នៅ និងអាស្រ័យផលក្នុងតំបន់នោះ ជាការបំពានដល់ MOU ២០០០, កិច្ចព្រមព្រៀងឈប់បាញ់ រវាងកម្ពុជា និងថៃ នាថ្ងៃទី២៨ ខែកក្កដា ឆ្នាំ២០២៥ និងស្មារតីនៃកិច្ចប្រជុំវិសាមញ្ញនៃគណៈកម្មាធិការ ព្រំដែនទូទៅកម្ពុជា-ថៃ(GBC) នាថ្ងៃទី៧ ខែសីហា ឆ្នាំ២០២៥ នៅប្រទេសម៉ាឡេស៊ី ព្រមទាំងស្មារតីនៃ កិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) រវាងប្រទេសទាំងពីរ នាថ្ងៃទី២២ ខែសីហា ឆ្នាំ២០២៥»។
លោកអភិបាលខេត្តបានស្នើឲ្យភាគីថៃរក្សាស្ថានភាពព្រំដែន និងស្ថានភាពប្រជាជនបច្ចុប្បន្នសិន រហូតដល់យន្តការផ្លូវការទាំងពីរគឺ GBC និង JBC អាចរកដំណោះស្រាយបាន។
ការឆ្លើយតបនេះធ្វើឡើងបន្ទាប់ពីលិខិតរបស់អភិបាលខេត្តស្រះកែវ លោក Parinya Phothisat ចុះថ្ងៃទី២៩ ខែសីហា ដែលបានកំណត់ឱសានវាទឲ្យកម្ពុជារើលំនៅឋានប្រជាពលរដ្ឋខ្មែរ ១៧០ គ្រួសារចេញពីតំបន់ដែលភាគីថៃអះអាងថាជាទឹកដីរបស់ពួកគេ។ តាមការចុះផ្សាយរបស់កាសែត The Nation របស់ថៃ ប្រជាពលរដ្ឋដែលរងផលប៉ះពាល់មាន ១៣៥ គ្រួសារនៅភូមិជោគជ័យ និង ៣៥ គ្រួសារនៅភូមិព្រៃចាន់ ដែលភាគីថៃហៅថា Ban Nong Chan និង Nong Ya Kaew។
ទោះជាយ៉ាងណា កម្ពុជាបានអះអាងជាច្រើនដងថាតំបន់ទាំងពីរនេះជាទឹកដីកម្ពុជាតាំងពីយូរលង់ណាស់មកហើយ។ ភស្តុតាងជាច្រើនបានបង្ហាញថា ប្រជាពលរដ្ឋកម្ពុជាបានរស់នៅ និងបង្កបង្កើនផលនៅតំបន់នេះតាំងពីមុនសម័យខ្មែរក្រហមមកម្ល៉េះ ដែលបញ្ជាក់ពីការគ្រប់គ្រងជាយូរលង់របស់កម្ពុជាលើតំបន់នេះ៕
