ក្រុមហ៊ុនកម្ពុជាអង្គរអ៊ែរ ដែលគេដឹងថា ជាក្រុមហ៊ុនអាកាសចរណ៍ជាតិ សហការណ៍ចូលហ៊ុនជាមួយក្រុមហ៊ុនវៀតណាមអ៊ែឡាញ នឹងប្ដូរឈ្មោះមកជា អាកាសចរណ៍ជាតិកម្ពុជាវិញ បន្ទាប់ពីមានការឯកភាពពីរាជរដ្ឋាភិបាលកម្ពុជា។
លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋាន អាកាសចរណ៍ស៊ីវិល បានបញ្ជាក់ប្រាប់បណ្តាញព័ត៌មានក្នុងស្រុកថា ការផ្លាស់ប្ដូរឈ្មោះ ក្រុមហ៊ុនកម្ពុជាអង្គរអ៊ែរ មកជាអាកាសចរណ៍ជាតិកម្ពុជា ក៏ដោយសារតែក្រុមហ៊ុន មានទស្សនទាន និងយុទ្ធសាស្រ្តដើម្បីពង្រឹង និងពង្រីកនូវសេវារបស់ខ្លួនដើម្បីធ្វើឱ្យមានភាពប្រសើរឡើងនូវអ្វីដែលមានស្រាប់ និងឆ្ពោះទៅបើកទីផ្សារថ្មីៗនៅក្នុងតំបន់។
តាមមន្រ្តីជាន់ខ្ពស់រូបនេះ អាកាសចរណ៍ជាតិកម្ពុជា មានទិសដៅទិញយន្តហោះ ប្រភេទ ATR ៧២-៦០០ ចំនួន៣គ្រឿងថែមទៀត។ យន្តហោះដែលគ្រោងធ្វើការបញ្ជាទិញនេះ ត្រូវបានរៀបចំឡើងដោយមានកន្លែងអង្គុយពីរចំណាត់ថ្នាក់ ដូចជា ចំណាត់ថ្នាក់ Business និងចំណាត់ថ្នាក់ Economics។
–
បើតាមអ្នកនាំពាក្យរដ្ឋលេខាធិការដ្ឋាន អាកាសចរណ៍ស៊ីវិល យន្តហោះថ្មីដែលមានការបញ្ជាទិញទាំង៣គ្រឿង ត្រូវបានគេរំពឹងថា នឹងដាក់ប្រើប្រាស់នាពេលឆាប់ៗខាងមុខ។ ការដាក់ឱ្យប្រើប្រាស់យន្តហោះថ្មីនេះ គឺដើម្បីអនុវត្តយុទ្ធសាស្ត្រ អភិវឌ្ឍន៍របស់រាជរដ្ឋាភិបាលកម្ពុជា បម្រើឱ្យការហោះហើរក្នុងស្រុកប្រកបដោយវិជ្ជាជីវៈ បម្រើប្រជាជនកម្ពុជា ឱ្យកាន់តែប្រសើរឡើង និងបង្កើនការហោះហើរក្នុងតំបន់បន្ថែមទៀត ដូចជាទៅកាន់ប្រទេសថៃ និង វៀតណាម ផងដែរ៕
