អវកាសយានិក ៣នាក់ កាលពីថ្ងៃពុធ វិលត្រឡប់មកផែនដីវិញដោយសុវត្ថិភាព ក្រោយចំណាយពេល ៦ខែស្នាក់នៅលើស្ថានីយអវកាសចិនធានកុង (Tiangong) ខណៈដែលទីក្រុងប៉េកាំងចង់ក្លាយជាមហាអំណាចនៅទីអវកាស។
នៅពេលមកដល់ផែនដី ក្រុមអវកាសយានិកចិនទាំង ៣នាក់សុទ្ធតែមានសុខភាពល្អ ក្នុងនោះមានអវកាសយានិកជាស្រ្តីម្នាក់ ដែលបានទៅបំពេញបេសកកម្មក្នុងលំហ ចាប់តាំងពីថ្ងៃទី២៩ ខែតុលា ឆ្នាំ២០២៤ រហូតដល់ថ្ងៃទី២៩ ខែមេសា ឆ្នាំ២០២៥។
យានត្រឡប់មកវិញ ដែលផ្ទុកអវកាសយានិកចិន Shenzhou-19 បានធ្លាក់ចុះមកដល់ផែនដីនៅក្នុងតំបន់ម៉ុងហ្គោលីដូចការគ្រោងទុក និងបានពាំនាំភាពជោគជ័យជាខ្លាំងត្រឡប់មកវិញ បន្ទាប់ពីបានបញ្ចប់បេសកម្មក្នុងលំហ។
ប្រទេសចិនបានពន្លឿនផែនការដើម្បីក្លាយជាមហាអំណាចអវកាសធំមួយ ចាប់តាំងតែពីប្រធានាធិបតីចិន លោក ស៊ី ជីនពីង បានឡើងកាន់អំណាច កាលពីជាង១ទសវត្សរ៍មុនមក។
ប្រទេសមហាអំណាចសេដ្ឋកិច្ចលំដាប់ទី២មួយនេះ បានវិនិយោគថវិការាប់ពាន់លានដុល្លារ ទៅក្នុងកម្មវិធីវិស័យអវកាសរបស់ខ្លួន ដើម្បីដើរឱ្យទាន់សហរដ្ឋអាមេរិកក៏ដូចជារុស្ស៊ី។
ដោយឡែក ចិនក៏មានគោលដៅផងដែរ ក្នុងការបញ្ជូនក្រុមអវកាសយានិក ទៅកាន់ផ្ទៃព្រះចន្ទនៅត្រឹមឆ្នាំ២០៣០ ហើយបន្ទាប់មកទៀត នឹងកសាងមូលដ្ឋានមួយនៅទីនោះ៕
