មេដឹកនាំកូរ៉េខាងជើង សម្ញែងរថក្រោះចម្បាំងទំនើបៗ ផលិតក្នុងស្រុក

មេដឹកនាំកូរ៉េខាងជើង លោក Kim Jong Un បានសម្ញែងរថក្រោះចម្បាំងទំនើបៗផលិតក្នុងស្រុក និងបានកោតសរសើរដល់វឌ្ឍនភាពដ៏អស្ចារ្យនៅក្នុងបច្ចេកវិទ្យាស្នូលនៃរថក្រោះរចនាបទកូរ៉េ ។

ទីភ្នាក់ងារសារព័ត៌មាន KCNA នៅថ្ងៃអាទិត្យនេះ បានបញ្ចេញរូបភាពលោក Kim ដើរទស្សនារោងចក្រផលិតរថក្រោះដ៏សំខាន់មួយកន្លែង នៅទីតាំងពុំបានបញ្ជាក់ ជាមួយក្រុមមន្រ្តីជាច្រើននាក់។ KCNA ក៏ពុំបានបញ្ជាក់ពីកាលបរិច្ឆេតនៃដំណើរទស្សនកិច្ចមួយនេះទេ។

នាឱកាសនោះ លោក Kim បាននិយាយថា ការផលិតរថក្រោះទំនើប និងរថពាសដែក គឺជារឿងសំខាន់ ក្នុងការធ្វើទំនើបកម្មកងទ័ព និងឈានដល់ផែនការរបស់គណបក្សកាន់អំណាច សម្រាប់បដិវត្តន៍ទី២ ក្នុងកងកម្លាំងប្រដាប់អាវុធ។

ដំណើរទស្សនកិច្ចរបស់លោក Kim កើតឡើង ស្របពេលមានការជំរុញកាន់តែខ្លាំងជាងមុនលើការធ្វើទំនើបកម្មកងកម្លាំងប្រដាប់អាវុធមិនមែននុយក្លេអ៊ែររបស់កូរ៉េខាងជើង បន្ថែមពីលើកាំភ្លើងធំនុយក្លេអ៊ែរ និងកាំភ្លើងធំមីស៊ីល៕