គណបក្ស Bhumjaithai ប្រកាសដើរចេញពីរដ្ឋាភិបាលចម្រុះ បន្ទាប់ពីបែកធ្លាយសារសន្ទនារវាងលោកស្រី Paetongtarn និងសម្ដេច ហ៊ុន សែន

ភ្នំពេញ/បាងកក — គណបក្ស Bhumjaithai បានប្រកាសដកខ្លួនចេញពីរដ្ឋាភិបាលចម្រុះដឹកនាំដោយគណបក្ស Pheu Thai បន្ទាប់ពីការបែកធ្លាយខ្លឹមសារកិច្ចសន្ទនាតាមទូរស័ព្ទរវាងនាយករដ្ឋមន្ត្រីថៃ លោកស្រី Paetongtarn Shinawatra និងប្រធានព្រឹទ្ធសភាកម្ពុជា សម្ដេចតេជោ ហ៊ុន សែន។ ដំណឹងនេះត្រូវបានផ្សព្វផ្សាយជាផ្លូវការនៅថ្ងៃនេះ ដោយសារព័ត៌មានថៃ The Nation។

នៅក្នុងសេចក្តីថ្លែងការណ៍ផ្លូវការ គណបក្ស Bhumjaithai បានចាត់ទុកថា កិច្ចពិភាក្សារវាងលោកស្រី Paetongtarn និងសម្ដេចហ៊ុន សែន បាន “បង្កគ្រោះថ្នាក់ដល់អធិបតេយ្យ និងបូរណភាពទឹកដីថៃ” ព្រមទាំងជំរុញឱ្យមានការព្រួយបារម្ភអំពីសន្តិសុខជាតិ។ បក្សនេះក៏បានអំពាវនាវឱ្យលោកស្រី Paetongtarn ទទួលខុសត្រូវលើបញ្ហានេះដែរ។

គណៈកម្មាធិការប្រតិបត្តិរបស់គណបក្ស Bhumjaithai បានប្រជុំអន្តរកាល និងសម្រេចដករដ្ឋមន្ត្រីទាំង៨នាក់របស់ខ្លួនចេញពីតំណែង ដោយដាក់លិខិតលាលែងជាផ្លូវការទៅលោកស្រី Paetongtarn។ ការដកខ្លួននេះនឹងចូលជាធរមានចាប់ពីថ្ងៃទី១៩ ខែមិថុនា។

ការដកខ្លួនរបស់ Bhumjaithai អាចនឹងបង្កឱ្យមានវិបត្តិអំណាចនៅក្នុងរដ្ឋាភិបាលចម្រុះថៃ ដោយធ្វើឱ្យគណបក្ស Pheu Thai ប្រឈមមុខនឹងការលំបាកក្នុងការគ្រប់គ្រងសម្ព័ន្ធភាពនយោបាយ។ អ្នកវិភាគមួយចំនួនព្យាករថា ស្ថានភាពនេះអាចនាំឱ្យមានការរៀបចំរដ្ឋាភិបាលថ្មី ឬសូម្បីតែការបោះឆ្នោតមុនពេលកំណត់៕