បន្ទាប់ពីមានការរិះគន់ពីរុស្ស៊ី ប្រធានាធិបតីបារាំង លោក អេមម៉ានុយអ៊ែល ម៉ាក្រុន (Emmanuel Macron) បាននិយាយកាលពីថ្ងៃចន្ទថា ការចាប់ខ្លួនស្ថាបនិកបណ្តាញតេឡេក្រាម (Telegram) លោក ប៉ាវែល ឌូរ៉ូវ (Pavel Durov) នៅក្នុងប្រទេសបារាំង មិនមែនជាការសម្រេចចិត្តផ្នែកនយោបាយនោះទេ។
កាលពីថ្ងៃសៅរ៍សប្តាហ៍មុន ជនជាតិរុស្សី លោក ឌូរ៉ូវ ដែលជាពលរដ្ឋនៃប្រទេសជាច្រើន ដែលរួមទាំងប្រទេសបារាំងផងនោះ ត្រូវបានចាប់ឃុំខ្លួននៅក្នុងប្រទេសបារាំង ក្រោមការចោទប្រកាន់ពាក់ព័ន្ធនឹងការប្រើប្រាស់កម្មវិធីតេឡេក្រាមសម្រាប់ឧក្រិដ្ឋកម្ម រួមទាំងអំពើភេរវកម្ម ការជួញដូរគ្រឿងញៀន ការលាងលុយកខ្វក់ និងការក្លែងបន្លំ ដែលអាចធ្វើឱ្យមហាសេដ្ឋីវ័យ ៣៩ឆ្នាំរូបនេះជាប់ពន្ធនាគាររហូតដល់ ២០ឆ្នាំ។
លោក ម៉ាក្រុន បាននិយាយនៅលើបណ្តាញសង្គមអ៊ិច (X) ថា «ការឃុំខ្លួន… ធ្វើឡើងជាផ្នែកមួយនៃការស៊ើបអង្កេតរបស់តុលាការដែលកំពុងបន្តនីតិវិធី។ នេះមិនមែនជាការសម្រេចចិត្តផ្នែកនយោបាយទេ។ សេចក្តីសម្រេចនឹងត្រូវធ្វើឡើងដោយចៅក្រម»៕
