ក្រុមហ៊ុនបច្ចេកវិទ្យាខ្នាតយក្ស Apple បានប្រកាសនៅថ្ងៃព្រហស្បតិ៍សប្តាហ៍នេះថា ខ្លួនបានចាប់ផ្តើមដំណើរការដឹកជញ្ជូន server បញ្ញាសិប្បនិម្មិត (AI) ដែលបានផលិតនៅក្នុងរោងចក្រថ្មីមួយនៅទីក្រុងហ៊ូស្តុន (Houston) សហរដ្ឋអាមេរិក។ នេះគឺជាផ្នែកមួយដ៏សំខាន់នៃផែនការវិនិយោគសរុប ៦០០ ពាន់លានដុល្លារ របស់ក្រុមហ៊ុននៅក្នុងទឹកដីអាមេរិក ក្នុងរយៈពេលប៉ុន្មានឆ្នាំខាងមុខ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៤ ខែតុលា ឆ្នាំ២០២៥។
Server AI ទាំងនេះត្រូវបានបំពាក់ដោយបន្ទះឈីបដែលត្រូវបានរចនាឡើងយ៉ាងពិសេស ដែលនឹងជួយក្រុមហ៊ុន Apple ក្នុងការផ្តល់មុខងារ AI ទំនើបៗ ដោយធានានូវសុវត្ថិភាព និងរក្សាវិធានការឯកជនភាពដ៏តឹងរ៉ឹងបំផុត ដូចទៅនឹងការប្រើប្រាស់លើឧបករណ៍ iPhone និង Mac ដែរ។ Server ដែលផលិតនៅក្នុងស្រុកនេះ នឹងត្រូវយកទៅដំឡើង និងប្រើប្រាស់នៅតាមមជ្ឈមណ្ឌលទិន្នន័យ (data centers) ទាំងអស់របស់ Apple នៅទូទាំងសហរដ្ឋអាមេរិក។
លោក Sabih Khan ប្រធានប្រតិបត្តិការ (Chief Operating Officer – COO) របស់ក្រុមហ៊ុន Apple បានសម្តែងការពេញចិត្ត និងមានប្រសាសន៍អំពីដំណើរការរោងចក្រនេះថា៖ «ក្រុមរបស់យើងបានធ្វើការងារដ៏អស្ចារ្យក្នុងការជំរុញល្បឿនការងារ ដើម្បីឱ្យរោងចក្រហ៊ូស្តុនថ្មីដំណើរការមុនកាលកំណត់ ហើយយើងមានគម្រោងបន្តពង្រីកទីតាំងនេះ ដើម្បីបង្កើនផលិតកម្មនៅឆ្នាំក្រោយ»។
គួរជម្រាបថា ការផ្លាស់ប្តូរមកផ្តោតលើការផលិត server នៅក្នុងទឹកដីអាមេរិកនេះ កើតឡើងស្របពេលដែលមានការជំរុញពីប្រធានាធិបតី លោក ដូណាល់ ត្រាំ ឱ្យក្រុមហ៊ុន Apple បង្កើនការផលិតនៅក្នុងប្រទេស។ ទោះបីជានាយកប្រតិបត្តិ (CEO) ក្រុមហ៊ុន Tim Cook ធ្លាប់បានបញ្ជាក់ថា ការដំឡើងទូរស័ព្ទ iPhone ទំនងជានៅតែបន្តធ្វើនៅក្រៅប្រទេសសម្រាប់ពេលបច្ចុប្បន្នក៏ដោយ ក៏ Apple កំពុងស្វែងរកការផ្គត់ផ្គង់បន្ទះឈីប និងគ្រឿងបន្លាស់សំខាន់ៗបន្ថែមទៀតពីសហរដ្ឋអាមេរិក៕
