FBI អាមេរិក​ចូល​មក​ចាប់ខ្លួនភ្នាក់ងារ CIA ម្នាក់ដល់​កម្ពុជា ក្រោយ​ធ្វើ​ឱ្យ​បែកធ្លាយផែនការវាយប្រហាររបស់អ៊ីស្រាអ៊ែល លើអ៊ីរ៉ង់

បុរសដែលជាទីភ្នាក់ងារសម្ងាត់​សហរដ្ឋអាមេរិក (CIA) ម្នាក់ឈ្មោះ Asif William Rahman ត្រូវ​បាន​ភ្នាក់ងារ FBI សហរដ្ឋអាមេរិក​ចូល​មក​ចាប់​ខ្លួន​ដល់​ប្រទេសកម្ពុជា និង​នាំ​យកទៅ​កាត់ទោស​ ក្រោយ​បានធ្វើ​ឱ្យ​បែកធ្លាយ​ឯកសារ​ផែនការ​វាយ​ប្រហារ​សងសឹករបស់​អ៊ីស្រាអ៊ែល ទៅលើ​ប្រទេស​អ៊ីរ៉ង់។

បើតាម​ការ​ចុះផ្សាយ​របស់កាសែតញូយ៉កថាមស៍ លោក Asif William Rahman ត្រូវ​បានចាប់ខ្លួន​កាលពីថ្ងៃទី១២ ខែវិច្ឆិកា នៅ​ប្រទេស​កម្ពុជា ។ កាសែតញូយ៉កថាមស៍ អះអាងថា ពីរថ្ងៃក្រោយត្រូវបានចាប់ខ្លួន ភ្នាក់ងារចារកម្ម Asif William Rahman ក៏ត្រូវបាននាំទៅបង្ហាញខ្លួននៅក្នុងតុលាការអាមេរិក។

បើតាម កាសែតញូយ៉កថាមស៍ ដដែល ឯកសារបែកធ្លាយនោះ បង្ហាញពីផែនការដែលអ៊ីស្រាអែលគ្រោងបាញ់គ្រាប់មីស៊ីលលើអ៊ីរ៉ង់ ដើម្បីជាការសងសឹកលើអ៊ីរ៉ង់វិញ ដែលបានបាញ់មីស៊ីលលើអ៊ីស្រាអែល កាលពីអំឡុងខែតុលា ឆ្នាំ២០២៤។ «ឯកសារនោះ បានបង្ហាញយ៉ាងលម្អិតនូវរូបភាពផ្កាយរណប ផ្តល់តម្រុយពីភាពអាចកើតមានឡើងនូវការវាយប្រហាររបស់អ៊ីស្រាអែលទៅលើអ៊ីរ៉ង់ ដោយប្រើគ្រាប់មីស៊ីល និងប្រភេទយន្តហោះចម្បាំងផ្សេងៗ ដែលអ៊ីស្រាអែលធ្លាប់ប្រើកន្លងមក»។

ជុំវិញ​ករណីប៉ូលិស FBI ចូល​មក​ចាប់ខ្លួន​ CIA អាមេរិក​នៅ​កម្ពុជានេះ លោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិកម្ពុជាមានប្រសាសន៍​ថា លោកមិនអាច​បក​ស្រាយ​ចំពោះ​ករណីនេះបានទេ៕