នាយករដ្ឋមន្ត្រីឡាវ ផ្តើម​ដំណើរទស្សនកិច្ចផ្លូវការនៅ​កម្ពុជា​រយៈពេល២ថ្ងៃ

ភ្នំពេញ – នៅព្រឹកថ្ងៃទី៤ ធ្នូ នេះ ឯកឧត្តមបណ្ឌិត សនសៃ ស៊ីផាន់ដន (Sonexay SIPHANDONE) នាយករដ្ឋមន្ត្រី នៃសាធារណរដ្ឋប្រជាធិបតេយ្យប្រជាមានិតឡាវ និងលោកជំទាវ វណ្ណដាឡា ស៊ីផាន់ដន (Vandala SIPHANDONE) បានដឹកនាំគណៈប្រតិភូជាន់ខ្ពស់ឡាវ អញ្ជើញមកដល់ព្រលានយន្តហោះអន្តរជាតិភ្នំពេញ ក្នុងដំណើរទស្សនកិច្ចផ្លូវការ នៅព្រះរាជាណាចក្រកម្ពុជា រយៈពេល០២ថ្ងៃ គឺចាប់ពីថ្ងៃទី០៤ ដល់ថ្ងៃទី០៥ ខែធ្នូ ឆ្នាំ២០២៤។

តាមសេចក្តីប្រកាស​ព័ត៌មានរបស់​ក្រសួងការបរទេស​កម្ពុជា ដំណើរទស្សនកិច្ច​របស់​នាយករដ្ឋមន្រ្តីឡាវនៅ​កម្ពុជានេះ គឺធ្វើឡើងតបតាមការ​អញ្ជើញ​របស់​សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា ក្នុងបំណង​ពង្រឹងបន្ថែម​នូវ​ចំណងមិត្តភាព​ជាប្រពៃណី​ដ៏​ល្អ​ដែលមានស្រាប់ និង​ពង្រីក​កិច្ច​សហប្រតិបត្តិការ​លើគ្រប់វិស័យ​រវាង​ប្រទេស​ទាំងពីរ។

–

ក្នុងអំឡុង​ពេលនៃ​ទស្សនកិច្ច​នៅ​កម្ពុជា នាយករដ្ឋមន្រ្តីឡាវ នឹងចូល​ក្រាបថ្វាយបង្គមគាល់​ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅព្រះបរមរាជវាំង ហើយ​បន្ទាប់​នាយករដ្ឋមន្រ្តីឡាវ ក៏​គ្រោង​នឹង​មានជំនួបសម្តែង​ការ​គួរ​សម​ដាច់​ដោយឡែក​ជាមួយ​សម្តេច​អគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា និង​សម្តេច​មហារដ្ឋសភា​ធិការធិបតី ឃួន សុដារី ប្រធានរដ្ឋសភា។

ឯកឧត្តមបណ្ឌិត សនសៃ ស៊ីផាន់ដន ក៏​នឹង​មានជំនួប​ទ្វេភាគី​ជាមួយសម្តេច​ធិបតី​នាយករដ្ឋមន្រ្តី​នៅ​វិមានសន្តិភាព ដែល​នាយករដ្ឋមន្រ្តី​ទាំងពីរ​នឹង​ពិភាក្សា​យ៉ាង​ស៊ីជម្រៅ​បន្ថែមទៀត​លើ​ការ​ពង្រឹងទំនាក់ទំនង​ដ៏កក់ក្តៅ និង​ពង្រីក​កិច្ច​សហប្រតិបត្តិការដែលមានផលប្រយោជន៍​រវាងប្រទេស​ទាំងពីរ ដោយផ្អែកលើស្មារតី​ភាពជា​អ្នកជិតខាងដ៏ល្អ មិត្តភាព​ជាប្រពៃណី និង​ភាពជាដៃគូ​យុទ្ធសាស្រ្ត​គ្រប់ជ្រុងជ្រោយ និង​យូរអង្វែង។

នាយករដ្ឋមន្រ្តី​ទាំងពីរ ក៏​នឹងផ្លាស់ប្តូរទស្សនៈ​លើ​បញ្ហា​តំបន់ និង​អន្តរជាតិ ដែលមាន​ផលប្រយោជន៍​រួមផងដែរ៕