អាជ្ញាធរ​រៀបចំធ្វើពិធីបុណ្យដឹងគុណប្រាសាទ និមន្ត​ព្រះសង្ឃ១០៨អង្គរាប់បាត្រ

ក្រោមអាកាសធាតុធម្មជាតិដ៏បវរនៃប្រាសាទកោះកេរ ពិធីបុណ្យដឹងគុណប្រាសាទបុរាណខ្មែរ ដោយការរាប់បាត្រព្រះសង្ឃចំនួន ១០៨អង្គ ត្រូវបានប្រារព្ធឡើងកាលពីថ្ងៃទី៩ ខែមេសា ដោយ​មានការអញ្ជើញចូលរួមពីឯកឧត្តម គីម រិទ្ធី អភិបាលខេត្តព្រះវិហារ ព្រមទាំងថ្នាក់ដឹកនាំមន្ទីរអង្គភាពនានា មេបញ្ជាការកងកម្លាំងទាំងបីប្រភេទ ពុទ្ធបរិស័ទជិតឆ្ងាយ លោកយាយ លោកតា និងបងប្អូនប្រជាពលរដ្ឋជាច្រើនរូបទៀត។

ពិធីបុណ្យ​ដឹងគុណប្រាសាទ បានធ្វើឡើងក្នុងគោលបំណងសម្តែងនូវការដឹងគុណចំពោះប្រាសាទបុរាណដ៏ពិសិដ្ឋ ដែលជាកេរដំណែលវប្បធម៌ដ៏ថ្លៃថ្លារបស់ជាតិ និងដើម្បីឧទ្ទិសកុសលជូនចំពោះមហាបព្វបុរសខ្មែរ។

–

ក្នុងពិធីបុណ្យនេះ គេឃើញមានពុទ្ធបរិស័ទយ៉ាងច្រើនកុះករបានអញ្ជើញមកចូលរួម ដោយនាំមកនូវចង្ហាន់ ទេយ្យទាន និងបច្ច័យផ្សេងៗ ដើម្បីប្រគេនដល់ព្រះសង្ឃ រួមនឹងពិធីរាប់បាត្រព្រះសង្ឃរហូតដល់ ១០៨អង្គ ដែលបានបង្ហាញយ៉ាងច្បាស់នូវសទ្ធាជ្រះថ្លា និងកម្លាំងសាមគ្គីដ៏រឹងមាំរបស់ប្រជាជនខ្មែរចំពោះព្រះពុទ្ធសាសនា៕