រដ្ឋាភិបាលចិន គ្រោងផ្ដល់នាវាធ្វើថ្មីពិសេសចំនួន ២គ្រឿង សម្រាប់កម្ពុជាប្រើប្រាស់តាមភាពជាក់ស្ដែង ដើម្បីលើកកម្ពស់កិច្ចសហប្រតិបត្តិការទ្វេភាគី និងបម្រើប្រយោជន៍ប្រទេសជាតិ និងប្រជាជន ស្របតាមគោលបំណង និងគោលការណ៍រដ្ឋធម្មនុញ្ញរបស់កម្ពុជា។
ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ ប្រាប់សារព័ត៌មានក្នុងស្រុកថា នាវាដែលចិននឹងផ្តល់មកឱ្យកម្ពុជា ជានាវាធ្វើថ្មីពិសេសសម្រាប់កម្ពុជាចំនួន ២គ្រឿង ប្រភេទ ០៥៦C ដែលគ្រោងនឹងរួចរាល់ និងប្រគល់មកកម្ពុជានៅឆ្នាំ២០២៥ ឬយូរជាងនេះ។
ឧត្តមសេនីយ៍ឯកបន្ថែមថា ការផ្តល់នាវាពីសំណាក់ចិន ធ្វើឡើងតាមការស្នើសុំរបស់កម្ពុជា ក្នុងគោលបំណងដើម្បីពង្រឹងសមត្ថភាព និងលទ្ធភាពក្នុងការការពារ និងរក្សាសន្តិភាព ស្ថេរភាព និងសន្តិសុខ ក៏ដូចជាការគាំទ្រទៅដល់ប្រតិបត្តិការស្វែងរក និងការសង្គ្រោះ ព្រមទាំងសកម្មភាពមនុស្សធម៌ដទៃទៀតនៅលើលម្អសមុទ្រ។
“កម្ពុជាក៏ធ្លាប់បានទទួលនូវការឧបត្ថម្ភជាច្រើនពីសំណាក់ប្រទេសដៃគូអភិវឌ្ឍដទៃទៀតផងដែរ ដូចជាការហ្វឹកហ្វឺន និងការផ្តល់គ្រឿងបរិក្ខាជាដើម ហើយយើងតែងតែស្វាគមន៍គ្រប់ភាគីទាំងអស់ ដែលមានបំណងជួយយើងដោយស្មោះស្ម័គ្រ និងពិតប្រាកដ”
ឧត្តមសេនីយ៍ឯក បន្តថា កម្ពុជា ជារដ្ឋអធិបតេយ្យ ដែលមានសិទ្ធិពេញលេញក្នុងការកសាង និងលើកកម្ពស់កិច្ចសហប្រតិបត្តិការជាមួយដៃគូទាំងអស់ ដើម្បីបម្រើប្រយោជន៍ឱ្យប្រទេសជាតិ និងប្រជាជន ហើយកិច្ចសហប្រតិបត្តិការទាំងអស់នោះ សុទ្ធតែស្របតាមគោលបំណង និងគោលការណ៍នៃរដ្ឋធម្មនុញ្ញរបស់កម្ពុជា ជាពិសេសការគោរព និងការការពារអធិបតេយ្យភាព បូរណភាពទឹកដី និងឯករាជ្យភាព។
ពាក់ព័ន្ធនឹងដំណើរការសាងសង់បញ្ជាការដ្ឋានសមុទ្ររាម ឧត្តមសេនីយ៍ឯក ម៉ាលី សុជាតា និយាយថា រដ្ឋាភិបាលបានសាងសង់រួចជំហានទីមួយ ហើយនឹងបន្តជំហានទីពីរទៀតដែលគ្រោងបង្ហើយការងារនេះក្នុងពេលឆាប់ៗខាងមុខ។
អ្នកនាំពាក្យក្រសួងការពារជាតិ បន្តថា រដ្ឋធម្មនុញ្ញបានបញ្ជាក់យ៉ាងច្បាស់ហើយថា កម្ពុជាមិនអនុញ្ញាតឱ្យមានមូលដ្ឋានទ័ពបរទេសនៅលើទឹកដីរបស់ខ្លួនឡើយ ហើយកម្ពុជាក៏មិនបញ្ជូនទ័ពរបស់ខ្លួនឱ្យទៅចូលរួមនៅក្នុងជម្លោះនៅក្រៅប្រទេសផងដែរ ក្រៅតែពីចូលរួមដល់ការរក្សាសន្តិភាពពិភពលោក តាមរយៈប្រតិបត្តិការរក្សាសន្តិភាពរបស់អង្គការសហប្រជាជាតិ។
ឧត្តមសេនីយ៍ឯក បន្ថែមថា ថ្នាក់ដឹកនាំក្រសួងការពារជាតិ បានបកស្រាយទៅលើបញ្ហាខាងលើនេះ ជាច្រើនលើកច្រើនសារមកហើយ ហើយថែមទាំងបានផ្តល់ព័ត៌មានលម្អិតជាច្រើន ដែលនេះវាគួរតែគ្រប់គ្រាន់ ដើម្បីបំបាត់ចម្ងល់ និងការសង្ស័យទាំងឡាយ ដូច្នេះក្រសួងស្នើបងប្អូនអ្នកសារព័ត៌មានសិក្សាស្វែងយល់អំពីបញ្ហានេះឱ្យបានត្រឹមត្រូវ និងច្បាស់លាស់ ហើយជៀសវាងការផ្សព្វផ្សាយព័ត៌មានដោយគ្មានមូលដ្ឋាន ដែលអាចនាំដល់ការយល់ច្រឡំ និងប៉ះពាល់ដល់ប្រយោជន៍ជាតិ៕
