ថៃត្រៀមបញ្ជូនមន្ត្រីទូតមកកម្ពុជាវិញ ដើម្បីស្តារទំនាក់ទំនង និងជំរុញការចរចាព្រំដែនគោក

យោងតាមការចុះផ្សាយរបស់សារព័ត៌មាន Khaosod នៅថ្ងៃទី០៨ ខែឧសភា ឆ្នាំ២០២៦ នេះ លោក Sihasak Phuangketkeow រដ្ឋមន្ត្រីការបរទេសថៃ បានឱ្យ​ដឹងថា ទំនាក់ទំនងការទូត កម្ពុជា និងថៃ បានឈានដល់ការបញ្ជូនមន្ត្រីទូតជាន់ខ្ពស់ (Chargé d’affaires) ឱ្យត្រឡប់ទៅបំពេញការងារនៅស្ថានទូតនៃប្រទេសទាំងពីរវិញ ដើម្បីបើកផ្លូវសហប្រតិបត្តិការ និងដោះស្រាយបញ្ហាដែលនៅសេសសល់ ជាពិសេសលើបញ្ហាព្រំដែនគោក។

លោកថា ការបញ្ជូនមន្ត្រីទូតត្រឡប់ទៅវិញនេះ គឺជាលទ្ធផលនៃជំនួបត្រីភាគីរវាងថ្នាក់ដឹកនាំកម្ពុជា ថៃ និងហ្វីលីពីន។ លោកបានសង្កត់ធ្ងន់ថា នេះគឺជា “ជំហានដំបូងបង្អស់” ក្នុងការកសាងបរិយាកាសវិជ្ជមាន និងការកសាងទំនុកចិត្តឡើងវិញ បន្ទាប់ពីទំនាក់ទំនងរវាងប្រទេសជិតខាងទាំងពីរមានភាពរកាំរកូសមួយរយៈ។

ក្រៅពីការងារការទូត កិច្ចសហប្រតិបត្តិការជាក់ស្តែងដែលនឹងត្រូវអនុវត្តភ្លាមៗ រួមមាន ស្តារកិច្ចសហការដើម្បីរួមគ្នាបង្ក្រាបក្រុមឆបោកតាមប្រព័ន្ធបច្ចេកវិទ្យា (Scam) ដែលជាបញ្ហាក្តៅក្នុងតំបន់។ ពង្រឹងតួនាទីសមាគមមិត្តភាព ដើម្បីធ្វើជាគ្រឹះនៃស្ថិរភាពយូរអង្វែង។

ពាក់ព័ន្ធនឹងបញ្ហាព្រំដែនដែលមហាជនតែងតែតាមដាន លោក Sihasak បានពន្យល់ថា ភាគីថៃមិនបានគេចវេះពីការចរចានោះទេ ប៉ុន្តែត្រូវការរៀបចំជាជំហានៗ៖

1. កិច្ចប្រជុំបច្ចេកទេស៖ កំពុងរៀបចំដើម្បីកំណត់ចំណុចចាប់ផ្តើមនៃការចរចាឱ្យបានច្បាស់លាស់។
2. យន្តការ JBC៖ បន្ទាប់ពីផ្នែកបច្ចេកទេសឯកភាពគ្នា នឹងឈានទៅដល់ការបើកកិច្ចប្រជុំគណៈកម្មការខណ្ឌសីមាព្រំដែនគោក (JBC) ជាផ្លូវការ។

រដ្ឋមន្ត្រីការបរទេសថៃរូបនេះបានបន្ថែមថា បញ្ហាខ្លះត្រូវការពេលវេលា ខណៈបញ្ហាខ្លះអាចដោះស្រាយបានភ្លាមៗ ប៉ុន្តែគោលការណ៍គ្រឹះគឺការប្រើប្រាស់ “ការពិភាក្សាដោយសន្តិវិធី” ជាជាងការប្រឈមមុខដាក់គ្នា៕