DG SuperApp គឺជាថ្នាលឌីជីថល ដែលត្រូវបានបង្កើតឡើងដោយកូនខ្មែរ ដែលក្រសួងប្រៃសណីយ៍ និងទូរគមនាគមន៍អះអាងថា មានសមត្ថភាពខ្ពស់អាចប្រមូលផ្តុំ ផ្ទាលនិងកម្មវិធីឌីជីថល (Mini Apps) សម្រាប់បម្រើសេវាសាធារណៈពហុវិស័យ។
បើតាមក្រសួងប្រៃសណីយ៍ នៅក្នុងដំណាក់កាលសាកល្បងនេះ ថ្នាល DG SuperApp នឹងដាក់បញ្ចូលកម្មវិធីបញ្ញាសិប្បនិម្មិតមួយចំនួន ដើម្បីជួយសម្រួលដល់ការសិក្សា ការស្រាវជ្រាវ ការវិភាគ និងការរស់នៅប្រចាំថ្ងៃរបស់មន្ត្រីរាជការ ធុរជន សិស្ស និស្សិត និងសាធារណជនទូទៅ ដែលកម្មវិធីបញ្ញាសិប្បនិម្មិតទាំងនោះរួមមាន DG ChatGPT ដែលអាចប្រើប្រាស់ដោយឥតគិតថ្លៃ និងមិនកំណត់ ហើយកម្រិតនៃការឆ្លើយតបប្រហាក់ប្រហែលនឹង ChatGPT ជំនាន់ទី៤ និងកម្មវិធីបកប្រែ TranslateKH ដែលមានសមត្ថភាពបកប្រែអត្ថបទរវាងភាសាខ្មែរនិងភាសាអង់គ្លេស។
ទន្ទឹមនឹងនេះ ថ្នាល DG SuperApp បានដាក់បញ្ចូលផ្ទាល និងកម្មវិធីរដ្ឋាភិបាលឌីជីថល (DGPs) ជាច្រើនដែលបានអភិវឌ្ឍដោយ ក.ប.ទ. មកដាក់បញ្ចូលទៅក្នុងថ្នាលរួមតែមួយ ដោយក្នុងនោះមានដូចជា ផ្ទាលផ្ទុកឯកសារសាធារណៈផ្លូវការ go.gov.kh, ថ្នាលបង្កើតទម្រង់ បែបបទអនឡាញ FormKH, ផ្ទាលបង្កើត QR Code, ផ្ទាលគ្រប់គ្រងនិងតាមដានលំហូរការងាររដ្ឋបាលស្វ័យប្រវត្តិ Flow.gov.kh និងថ្នាលនិងកម្មវិធីជាច្រើនទៀត។
បើតាមក្រសួងប្រៃសណីយ៍ និងទូរគមនាគមន៍ នាពេលអនាគត ថ្នាល DG SuperApp នឹងបន្តដាក់បញ្ចូលបន្ថែម នូវកម្មវិធីបញ្ញាសិប្បនិម្មិតសំខាន់ៗបន្ថែមទៀត រួមមាន DG DeepSeek និង DG Gemini ព្រមទាំងផ្ទាលនិងកម្មវិធី ឌីជីថលសំខាន់ៗជាច្រើនបន្តបន្ទាប់ទៀត ដើម្បីបម្រើដល់ការផ្តល់សេវាសាធារណៈផងដែរ។
សាធារណជនអាចទាញយក ផ្ទាល DG SuperApp មកប្រើប្រាស់សាកល្បងដោយឥតគិតថ្លៃចាប់ពីពេលនេះតទៅ ដោយគ្រាន់តែវាយពាក្យ “DG SuperApp” នៅលើ App Store ឬ Play Store៕
