លោក វ៉ាង យី ៖ ប្រទេសធំៗមិនអាចវាយប្រហារប្រទេសដទៃទៀតទាំងបំពានដោយផ្អែកលើឧត្តមភាពយោធានោះឡើយ

នៅក្នុងការសន្ទនាតាមទូរសព្ទមួយរវាងលោក វ៉ាង យី (Wang Yi) សមាជិក​ការិយាល័យ​នយោបាយ​នៃ​គណៈកម្មាធិការ​មជ្ឈិម​បក្ស​កុម្មុយនិស្ត​ចិន និង​ជា​រដ្ឋមន្ត្រី​ការបរទេសចិន ជាមួយលោក ហ្សង់-ណូអ៊ែល បារ៉ុត (Jean-Noël Barrot) រដ្ឋមន្ត្រី​ការបរទេស​បារាំងកាលពីម្សិលមិញ លោក វ៉ាង បានលើកឡើងថា សហគមន៍អន្តរជាតិគួរតែបដិសេធចំពោះការរំលោភបំពានច្បាប់អន្តរជាតិណាមួយ ហើយប្រទេសធំៗមិនអាចវាយប្រហារប្រទេសដទៃទៀតដោយបំពានដោយផ្អែកលើឧត្តមភាពយោធានោះឡើយ។

លោក វ៉ាង បានបញ្ជាក់សារជាថ្មីនូវជំហរគោលការណ៍របស់ប្រទេសចិន និងបានសង្កត់ធ្ងន់ថា សហគមន៍អន្តរជាតិគួរតែបដិសេធការរំលោភច្បាប់អន្តរជាតិនានា ហើយមិនត្រូវចូលរួមក្នុងស្តង់ដារពីរឡើយ ហើយម៉្យាងទៀត ពិភពលោកក៏មិនត្រូវដើរថយក្រោយទៅរកការប្រើប្រាស់ច្បាប់ព្រៃនោះដែរ។ បញ្ហានុយក្លេអ៊ែរអ៊ីរ៉ង់នឹងវិលត្រឡប់ទៅរកផ្លូវនៃការដោះស្រាយនយោបាយ និងការទូតវិញនៅទីបំផុត។ យើងសង្ឃឹមថា ភាគីបារាំងនឹងប្រកាន់ខ្ជាប់នូវគោលជំហរមិនលំអៀង និងយុត្តិធម៌ រក្សាអាកប្បកិរិយាស្ងប់ស្ងាត់ និងសមហេតុផល ធ្វើការជាមួយប្រទេសចិន ដើម្បីបន្ធូរបន្ថយស្ថានការណ៍ និងរួមគ្នាការពារបទដ្ឋានជាមូលដ្ឋាននៃទំនាក់ទំនងអន្តរជាតិ។

នៅក្នុងកិច្ចសន្ទនានោះ លោក បារ៉ុត បានចែករំលែកទស្សនៈរបស់ប្រទេសបារាំង ស្តីពីស្ថានភាពបច្ចុប្បន្ននៅមជ្ឈិមបូព៌ា ដោយបានសង្កត់ធ្ងន់ថាប្រទេសបារាំង និងប្រទេសចិនសុទ្ធតែជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ និងទទួលខុសត្រូវពិសេសក្នុងការរក្សាសន្តិភាព និងសន្តិសុខអន្តរជាតិ។ សហរដ្ឋអាមេរិក និងអ៊ីស្រាអែលមិនទាន់បានពិគ្រោះយោបល់ជាមួយក្រុមប្រឹក្សាសន្តិសុខអង្គការសហប្រជាជាតិទេហើយក៏មិនទាន់ត្រូវបានក្រុមប្រឹក្សាសន្តិសុខអនុញ្ញាតឱ្យធ្វើសកម្មភាពយោធាប្រឆាំងនឹងប្រទេសអ៊ីរ៉ង់ដែរ។ គ្រប់ភាគីទាំងអស់គួរតែធ្វើការរួមគ្នាដើម្បីបន្ធូរបន្ថយស្ថានការណ៍ និងដោះស្រាយបញ្ហា ដូចជាបញ្ហានុយក្លេអ៊ែរអ៊ីរ៉ង់តាមរយៈកិច្ចចរចាជាដើម។ ប្រទេសចិនរក្សាទំនាក់ទំនងល្អជាមួយអ៊ីរ៉ង់និងប្រទេសនានានៅក្នុងតំបន់ឈូងសមុទ្រ ហើយទន្ទឹងរង់ចាំធ្វើការជាមួយប្រទេសចិនដើម្បីដើរតួនាទីវិជ្ជមានក្នុងការបន្ធូរបន្ថយស្ថានការណ៍នៅក្នុងតំបន់៕