ភ្នំពេញ – ក្រសួងសុខាភិបាលកាលពីថ្ងៃចន្ទ បានធ្វើការអំពាវនាវដល់បងប្អូនប្រជាពលរដ្ឋទាំងអស់ឱ្យមានការប្រុងប្រយ័ត្នការពារសុខភាពពីជំងឺផ្លូវដង្ហើមគ្រប់ប្រភេទ ពិសេស យូមិនមេតាភ្នឺម៉ូវីរុស នៅអំឡុងពេលអាកាសធាតុចុះត្រជាក់។
បើតាមក្រសួងសុខាភិបាល យូមិនមេតាភ្នឺម៉ូវីរុស បង្កឱ្យមានជំងឺផ្លូវដង្ហើម ដែលមានរោគសញ្ញាស្រដៀងទៅនឹងជំងឺផ្តាសាយធំ ដូចជា គ្រុនផ្តាសាយ ហូរសំបោរ រលាកបំពង់ក ក្អក កណ្តាស់។ យូមិនមេតាភ្នឺម៉ូវីរុស អាចបណ្តាលជាជំងឺធ្ងន់ធ្ងរលើទារក កុមារ មនុស្សវ័យចំណាស់លើសពី ៦៥ឆ្នាំ ឬអ្នកមានប្រព័ន្ធការពាររាងកាយខ្សោយ។
ជាមួយគ្នានេះ ក្រសួងសុខាភិបាលបានបង្ហាញពីរបៀបចម្លងនៃមេរោគ យូមិនមេតាភ្នឺម៉ូវីរុស ដោយវាឆ្លងតាមរយៈការក្អក និងកណ្តាស់ ឬការប៉ះពាល់ជិតស្និទ្ធ ដូចជាការប៉ះ ឬចាប់ដៃ ឱប ថើប ប៉ះវត្ថុ ឬផ្ទៃដែលមានមេរោគ បន្ទាប់មកប៉ះមាត់ ច្រមុះ ឬភ្នែក។
ដោយឡែករោគសញ្ញានៃជំងឺនេះ រួមមាន ៖ ក្អក គ្រុនក្តៅ តឹងច្រមុះ ហូរសំបោរ និងហត់ (ដង្ហើមខ្លី) អាចវិវត្តទៅជាជំងឺរលាកទងសួត ឬជំងឺរលាកសួត ហើយស្រដៀងគ្នាទៅនឹងរោគសញ្ញានៃជំងឺផ្លូវដង្ហើមដែលបណ្តាលមកពីមេរោគផ្សេងទៀត។ រយៈពេលពីការឆ្លងទៅដល់ចេញរោគសញ្ញា (រយៈពេលសំងំ) គឺពី ៣ ទៅ៦ថ្ងៃ។
យូមិនមេតាភ្នឺម៉ូវីរុស ត្រូវបានរកឃើញដំបូងក្នុងឆ្នាំ២០០១ នៅប្រទេសហូឡង់ ហើយប្រទេសកម្ពុជាក៏ធ្លាប់រកឃើញជំងឺនេះលើកុមារក្នុងអំឡុងឆ្នាំ២០០៧ ដល់ឆ្នាំ២០០៩។ នៅកម្ពុជា ដោយសារអាកាសធាតុមិនត្រជាក់ខ្លាំង ជំងឺនេះមិនសូវធ្ងន់ធ្ងរដូចជំងឺផ្តាសាយធំទេ ហើយកុមារភាគច្រើនបានជាសះស្បើយឡើងវិញ។ អ្នកវិទ្យាសាស្រ្តបានប៉ាន់ស្មានថា ប្រហែល ១០ ទៅ ១២ភាគរយ នៃជំងឺផ្លូវដង្ហើមចំពោះកុមារ គឺបណ្តាលមកពីយូមិនមេតាភ្នឺម៉ូវីរុស តែករណីភាគច្រើនគឺស្រាល ប៉ុន្តែប្រហែលពី ៦ ទៅ១៦ភាគរយ នៃកុមារនឹងវិវត្តទៅជាជំងឺរលាកទងសួត រលាកសួត៕
