ភ្នំពេញ – ក្រសួងព័ត៌មានបានចាប់ផ្តើមយុទ្ធនាការ «និយាយថាទេចំពោះព័ត៌មានក្លែងក្លាយ» ចាប់ពីថ្ងៃទី១ ខែមេសា ឆ្នាំ២០២៥ ដើម្បីប្រយុទ្ធប្រឆាំងនឹងព័ត៌មានមិនពិត ដែលកំពុងរីករាយនៅលើបណ្តាញសង្គម។ យុទ្ធនាការនេះធ្វើឡើងចំថ្ងៃ April Fool’s Day (ថ្ងៃនៃការភូតកុហក់របស់ពលរដ្ឋបស្ចឹមប្រទេស)។
យុទ្ធនាការនេះ នឹងសំដៅធានានូវសន្តិសុខព័ត៌មាន ដែលផ្តោតទៅលើគោលសំខាន់បី គឺធានាសិទ្ធិទទួលព័ត៌មានរបស់ប្រជាពលរដ្ឋ គុណភាពព័ត៌មាន ផ្តល់ជូនប្រជាពលរដ្ឋ និងសុវត្ថិភាពព័ត៌មានសម្រាប់ប្រជាពលរដ្ឋប្រើប្រាស់។
លោក នេត្រ ភក្រ្តា រដ្ឋមន្ដ្រីក្រសួងព័ត៌មាន បានលើកឡើងថា «យុទ្ធនាការ «និយាយថាទេ ចំពោះព័ត៌មានក្លែងក្លាយ!» ធ្វើឡើងផ្តោតជាសំខាន់ដើម្បីទប់ស្កាត់ និងប្រយុទ្ធប្រឆាំងព័ត៌មានក្លែងក្លាយដែលកំពុងជ្រៀតចូលបណ្ដាញទំនាក់ទំនងសង្គម ដូចជា TikTok, Facebook និងប្រព័ន្ធផ្សព្វផ្សាយទំនើបជាច្រើនផ្សេងទៀត»។
លោកបានអះអាងថា «បើសិនជាមានព័ត៌មានក្លែងក្លាយផ្សព្វផ្សាយ យើងនឹងចាត់វិធានការដោយធ្វើការងារផ្ទាល់ជាមួយ Facebook និង TikTok តែម្ដង ដើម្បីបិទគណនីនោះចោល ឬបើពាក់ព័ន្ធករណីធ្ងន់ធ្ងរ [ម្ចាស់គណនី] ត្រូវប្រឈមមុខនឹងច្បាប់ ពីព្រោះនេះមិនមែនជាពេលវេលាអប់រំទៀតទេ»។
លោក នេត្រ ភក្រ្តា រដ្ឋមន្រ្តីក្រសួងព័ត៌មាន
លោកបានលើកឡើងថា ការបង្កើតព័ត៌មានក្លែងក្លាយមិនមែនជាសេរីភាពនៃសារព័ត៌មាននោះទេ មិនមែនជាសេរីភាពនៃការបោះពុម្ពផ្សាយទេ តែជាការប្រព្រឹត្ដិខុសច្បាប់របស់កម្ពុជា។
លោក ទេព អស្នារិទ្ធ អ្នកនាំពាក្យក្រសួងព័ត៌មានបានឱ្យដឹងថា យុទ្ធនាការ «និយាយថាទេចំពោះព័ត៌មានក្លែងក្លាយ» ចាប់ផ្ដើមពីរាជធានីភ្នំពេញ និងខេត្ដកណ្ដាលក្នុងខែមេសា និងបន្ដទៅកំពង់ស្ពឺ កំពង់ឆ្នាំងនៅខែឧសភា ជាបន្ដបន្ទាប់រហូតដល់ ២៥ រាជធានី-ខេត្ដរយៈពេលមួយឆ្នាំពេញ។
លោកបានថ្លែងថា យុទ្ធនាការត្រូវបានផ្សព្វផ្សាយគ្រប់បណ្ដាញសារព័ត៌មានទាំងបុរាណ និងសម័យឌីជីថល បណ្ដាញទំនាក់ទំនងសង្គម រួមទាំងសំឡេងរោទ៍ទូរស័ព្ទ ដែលបច្ចុប្បន្នគ្របដណ្ដប់ ២០លានស៊ីមកាត៕
