ថៃត្រៀមចរចាឡើងវិញជាមួយកម្ពុជា ក្នុងការ​បូមប្រេង​នៅ​បាតសមុទ្រ​តំបន់ត្រួតស៊ីគ្នា

កាសែតបាងកករបស់ថៃបានរាយការណ៍​នៅថ្ងៃព្រហស្បត្តិ៍ថា រាជរដ្ឋាភិបាលថ្មីរបស់ថៃ ដែលដឹកនាំដោយអ្នកស្រី ផេថងថាន ស៊ីណាវ៉ាត់ត្រា ត្រៀមចរចាឡើងវិញ ជាមួយរាជរដ្ឋាភិបាលកម្ពុជា អំពីបេសកកម្មរួមគ្នាក្នុងការរុករក និងការបូមប្រេងក្នុងបាតសមុទ្រ ជាកម្មសិទ្ធិរបស់ភាគីទាំង២។

បើតាមកាសែតដ៏ធំនេះ ប្រេង និងធនធានធម្មជាតិក្នុងបាតសមុទ្រ ដែលភាគីទាំង២មានសិទ្ធិកាន់កាប់រួមគ្នា ត្រូវគេប៉ាន់ស្មានជាមុនថា អាចមានតម្លៃប្រមាណ៣០០ពាន់លានដុល្លារ។ តាមគោលការណ៍ ភាគីទាំង២​ ត្រូវចែកស្មើគ្នា។

កាសែតបាងកកប៉ុស្តិ៍ បានស្រង់ប្រសាសន៍របស់អ្នកស្រីនាយករដ្ឋមន្រ្តី ផេថងថាន ស៊ីណាវ៉ាត់ត្រា ទៅសរសេរថា ការរុករកប្រេងជាមួយកម្ពុជា គឺជាកិច្ចការបន្ទាន់១ ក្នុងចំណោមកិច្ចការបន្ទាន់ទាំង១០ ដែលគណៈរដ្ឋមន្រ្តីរបស់អ្នកស្រីត្រូវធ្វើ។ ប៉ុន្តែបាងកកប៉ុស្តិ៍ មិនបានបញ្ជាក់ឱ្យច្បាស់ថា នាយករដ្ឋមន្រ្តីខ្លួន និយាយសម្តីនេះនៅពេលណា ឬនៅទីណាឡើយ។ បើតាមកាសែតនេះដដែល ភាគីកម្ពុជា បានយល់ព្រមតាំងពីដើមឆ្នាំ២០២៤មកម្ល៉េះថានឹងចរចាជាមួយភាគីថៃ អំពីការធ្វើអាជីវកម្មរុករកប្រេងនេះជាមួយគ្នា និងដោយស្មើភាពគ្នា៕